राष्ट्रवादी काँग्रेसमधील सत्तासंघर्षावर आज निवडणूक आयोगात सुनावणी सुरू असतानाच शरद पवार गटाने मोठी खेळी केली आहे. शरद पवार गटाने अजित पवार गटाविरोधात थेट सुप्रीम कोर्टात धाव घेतली आहे.

राष्ट्रवादीतील संघर्ष शिवसेनेच्या वाटेने

शरद पवार गटाचे प्रदेशाध्यक्ष जयंत पाटील यांनी अजितदादा गटाच्या सर्व आमदारांविरोधात सुप्रीम कोर्टात याचिका दाखल केली आहे. अजितदादा गटाच्या आमदारांवर कारवाई करण्याची मागणी, या याचिकेत करण्यात आली आहे. त्यामुळे राष्ट्रवादीतील संघर्षही शिवसेनेच्याच वाटेने जाणार असल्याचे स्पष्ट होत आहे.

अजितदादा गटाच्या अडचणी वाढणार

जयंत पाटील यांनी सुप्रीम कोर्टात केलेल्या याचिकेत अजित पवार यांच्यासोबत गेलेल्या आमदारांवर कारवाई करावी, अशी मागणी करण्यात आली आहे. त्यामुळे आगामी काळात अजित पवार गटाच्या आमदारांच्या अडचणी वाढ होते का? हे पाहणे महत्त्वाचं ठरणार आहे.

शरद पवारांचा निवडणूक आयोगावर आरोप

राष्ट्रवादीचे पक्षचिन्ह आणि पक्षाच्या नावासंदर्भात आज निवडणूक आयोगासमोर सुनावणी सुरू आहे. त्यापूर्वी शरद पवार गटाने निवडणूक आयोगासमोर आपली भूमिका मांडली होती. आयोग एकांगी भूमिका घेत असल्याचा आरोप शरद पवार गटाच्या वकिलांनी केला होता.  राष्ट्रवादी काँग्रेस पक्षामध्ये फूट पडलेली नाही. विधीमंडळ पक्ष आणि मूळ पक्ष हे वेगळे आहेत. तरीही निवडणूक आयोग राष्ट्रवादीत फूट पडली असल्याचे म्हणत आहे, असे शरद पवार गटाचे म्हणणे होते.

अजित पवार व समर्थकांनी केली होती बंडखोरी

अजित पवार यांनी गेल्या जुलै महिन्यात राष्ट्रवादी काँग्रेसमध्ये मोठी बंडखोरी केली होती. त्यांच्यासह राष्ट्रवादीचे छगन भुजबळ, हसन मुश्रीफ, दिलीप वळसे पाटील, धनंजय मुंडे आदी बड्या नेत्यांनीही शरद पवार यांची साथ सोडली होती. त्यानंतर ही मंडळी भाजप - शिवसेनेच्या सरकारमध्ये सहभागी झाली. त्यात अजित पवार स्वतः उपमुख्यमंत्री झाले, तर अन्य आमदार कॅबिनेट मंत्री झाले. या घटनाक्रमानंतर या गटाने थेट राष्ट्रवादी काँग्रेस पक्ष व निवडणूक चिन्हावर दावा सांगितला. यासाठी त्यांनी थेट निवडणूक आयोगाकडे धाव घेतली. तर, आता शरद पवार गटाने सुप्रीम कोर्टात धाव घेतली आहे. त्यामुळे राष्ट्रवादीतील संघर्ष आता निवडणूक आयोग व सुप्रीम कोर्टातही रंगणार आहे.