कोचिंग क्लासवाल्या शिक्षकाने फोडले 12 वी चे पेपर , एका विद्यार्थिनीचे मोबाईल जप्त करून चौकशी सुरू ; या प्रकरणाने राज्याच्या शिक्षण क्षेत्रात प्रचंड खळबळ

नागपूर : बारावी परीक्षेचे दोन पेपर फुटले असल्याचे पोलिस तपासात उघड झाले आहे, याप्रकरणी नागपूर पोलिसांनी गुन्हा दाखल केला आहे. व्हॉट्सअ‍ॅप ग्रुप तयार करून हा सगळा पेपर फोडण्याचा प्रकार सुरू होता अशी माहिती पोलिसांनी दिली.
या प्रकरणी नागपूरच्या सदर पोलिस ठाण्यात गुन्हा दाखल करण्यात आला आहे. एका विद्यार्थिनीचा स्मार्टफोन जप्त करण्यात आला आहे. या प्रकरणात आणखी कोण सहभागी आहे? याचा पोलिस कसून तपास करीत आहेत. एका खासगी शिकवणी वर्गातील शिक्षकाने पैसे घेऊन पेपर फोडल्याची माहिती समोर आली आहे.सदर परिसरातील सेंट उर्सुला परीक्षा केंद्रावर हे प्रकरण उघडकीस आले आहे. बारावीच्या विज्ञान शाखेचे फिजिक्स आणि केमिस्ट्रीचे पेपर परीक्षेच्या तासाभरापूर्वीच व्हॉट्सअ‍ॅपवर आल्याची माहिती समोर येत आहे. गुरुवारी बारावीचा केमिस्ट्रीचा पेपर होता मात्र परीक्षेआधी पेपर विद्यार्थ्यांच्या व्हॉट्सअ‍ॅप ग्रुपवर आला होता.
सेंट उर्सुला परीक्षा केंद्रावर एक विद्यार्थिनी वारंवार प्रसाधनगृहात जात होती त्यामुळे केंद्रावरील पर्यवेक्षकाला तिचा संशय आला. त्यांनी तिची शिक्षिकेच्या माध्यमातून झाडाझडती घेतली. तिच्याकडील एक स्मार्टफोन जप्त करण्यात आला आहे. या मोबाईलमध्ये एका व्हॉट्सअ‍ॅप ग्रुपवर परीक्षा सुरू होण्यापूर्वी पेपर आलेला होता, असे पोलिसांनी सांगितले. केंद्रप्रमुखांनी सदर पोलिसांना माहिती दिल्यावर पोलिसांनी तपास करून गुन्हा दाखल केला आहे.
खासगी शिकवणी वर्गाचे कनेक्शनजप्त करण्यात आलेल्या मोबाईलमध्ये १५ विद्यार्थ्यांचा एक ग्रुप तयार करण्यात आल्याचे आढळले. या ग्रुपमधील दोन विद्यार्थिनींची चौकशी पोलिस करीत आहेत. एका खासगी शिकवणी वर्गातील शिक्षकाने पैसे घेऊन पेपर फोडल्याची माहिती समोर आली आहे. या ग्रुपमधील अन्य १३ विद्यार्थी शहरातील वेगवेगळ्या केंद्रांवर परीक्षा देत होते. या रॅकेटमध्ये आणखी कोणाचे हात गुंतले आहेत का, हे लवकरच समजेल.

आपली शाळा, महविद्यालय,संस्था व संघटना यांच्या बातम्या, फोटो 7588005002 या नंबर वर व्हॉट्स ॲप वर पाठवा....कथा,कविता,पुस्तक परीक्षण, वैचारिक लेखन देखील उपरोक्त नंबर पाठवावे