शिवराज पाटील चाकुरकर यांच्यावर शासकीय इतमामात अंत्यसंस्कार, देशभरातील विविध पक्षाच्या या नेत्यांची उपस्थिती

लातूर : प्रतिनिधीसहा दशके आपल्या सुसंस्कृत राजकारणाचा ठसा उमटवणारे लातूर जिल्ह्याचे सुपूत्र लोकसभेचे माजी सभापती शिवराज पाटील चाकुरकर यांच्या पार्थिवावर दि. १३ डिसेंबर रोजी सकाळी ११.३० वाजता लातूर शहरापासून जवळच असलेल्या वरवंटी येथील त्यांच्या शेतामध्ये शासकीय इतमामात तसेच मंत्रोच्चारात अंत्यसंस्कार करण्यात आले.  यावेळी देशभरातून आलेल्या असंख्य मान्यवरांनी शिवराज पाटील चाकुरकर यांना भावपूर्ण श्रद्धांजली अर्पण करुन त्यांना शेवटचा निरोप दिला. यावेळी पोलीस दलाच्या वतीने बंदुकीच्या फैरींची सलामी देऊन मानवंदना दिली.

देशाचे माजी गृहमंत्री, लोकसभेचे माजी सभापती, पंजाबचे माजी राज्यपाल शिवराज पाटील चाकुरकर यांचे दि. १२ डिसेंबर रोजी निधन झाले. शनिवारी सकाळी देवघर निवासस्थानी शिवराज पाटील चाकुरकर यांच्या पार्थिवाला पोलीस दलातर्फे मानवंदना दिल्यानंतर अंत्ययात्रेस सुरुवात झाली. त्यांचे पार्थिव औसा रोडवरुन छत्रपती शिवाजी महाराज चौक, संविधान चौक, एक नंबर चौक, पीव्हीआर चौक, एमआयडीसी मार्गे वरवंटी येथील त्यांच्या शेतात आणण्यात आले. यावेळी उपस्थित शोकाकुल जनसमुदाच्या उपस्थितीत शिवराज पाटील चाकुरकर यांच्या पार्थिवावर शासकीय इतमामात तसेच मंत्रोच्चारात अंत्यसंस्कार करण्यात आले.

यावेळी लोकसभेचे सभापती ओम बिर्ला, काँग्रेस पक्षाचे राष्ट्रीय अध्यक्ष तथा राज्यसभेचे विरोधी पक्षनेते मल्लिकार्जून खरगे, केंद्रीय संरक्षण राज्यमंत्री संजय सेठ, माजी मुख्यमंत्री, खासदार अशोकराव चव्हाण, कर्नाटक राज्याचे वनमंत्री ईश्वर खंड्रे, माजी मंत्री दिलीपराव देशमुख, खासदार डॉ. शिवाजी काळगे, खासदार डॉ. भागवत कराड, खासदार रजनीताई पाटील, खासदार डॉ. अजित गोपछडे, महाराष्ट्र प्रदेश काँग्रेसचे अध्यक्ष हर्षवर्धन सपकाळ, माजी मंत्री, आमदार अमित विलासराव देशमुख, आमदार अभिमन्यू पवार, आमदार संभाजी पाटील निलंगेकर, आमदार संजय बनसोडे, माजी खासदार चंद्रकांत खैरे, माजी आमदार तथा लातूर जिल्हा बँकेचे चेअरमन धिरज विलासराव देशमुख, पंजाबचे डीआयजी इंदरवीरसिंह, नांदेड परिक्षेत्राचे पोलीस उपमहानिरीक्षक शहाजी उमाप, जिल्हाधिकारी वर्षा ठाकुर-घुगे, पोलीस अधीक्षक अमोल तांबे, जिल्हा परिषदेचे मुख्य कार्यकारी अधिकारी राहूल कुमार मीना, मुंबई उच्च न्यायालयाचे माजी मुख्य न्यायाधीश नरेश पाटील यांनी शिवराज पाटील चाकुरकर यांना श्रद्धांजली अर्पण केली.

शिवराज पाटील यांनी संसदेची प्रतिष्ठा कायम ठेवली- ओमप्रकाश बिरला:- 
शिवराज पाटील चाकूरकर यांनी आपल्या ६ दशकांच्या राजकीय, सामाजिक जीवनात प्रामाणिकपणे देशाची सेवा केली. लोकसभेचे अध्यक्ष म्हणून काम करताना त्यांनी लोकशाहीचे मंदिर असलेल्या संसदेची प्रतिष्ठा कायम ठेवण्यासाठी भरीव योगदान दिले केला, संसदीय परंपरेला नवा आयाम दिला. संसदीय समित्यांसाठी त्यांनी पुढाकार घेतला. राजकारणातील त्यांचे योगदान नेहमीच स्मरणात राहील, अशा शब्दात लोकसभा अध्यक्ष ओम बिर्ला यांनी आपल्या भावना व्यक्त केल्या.

शिवराज पाटील यांची उणिव सतत भासत राहील - खरगे शिवराज पाटील चाकूरकर यांच्यासोबत १९६७ पासून काम करण्याची संधी मिळाली. त्यांनी विविध पदांवर काम करताना समाजाची सेवा करत विकासासाठी भरीव योगदान दिले. एक सुस्वभावी व्यक्तीमत्व असलेले शिवराज पाटील श्रीमती इंदिरा गांधी, राजीव गांधी, सोनिया गांधी आणि राहूल गांधी यांचे आवडते व्यक्तीमत्व होते. त्यांची उणीव सदैव भासत राहील, असे राज्यसभा विरोधी पक्षनेते मल्लिकार्जुन खरगे यावेळी म्हणाले.