भाजप आमदार सुरेश धस यांच्याकडून जीवाला धोका; प्रसिद्ध वकील असीम सरोदे यांच्या दाव्याने खळबळ

मुंबई : (प्रतिनिधी)  राम खाडे यांनी सुरेश धस यांचे १००० कोटींची जमीन हडप केल्याचे प्रकरण काढले होते. हे प्रकरण माझ्याकडे होते. मी काही दिवसांपूर्वीच राम खाडे यांना काळजी घेण्याची सूचना केली होती. त्यानंतर त्यांच्यावर प्राणघातक हल्ला झाला. या घटनेनंतर आमदार सुरेश धस यांच्याकडून माझ्या जीवाला धोका असल्याचा खळबळजनक दावा असीम सरोदे यांनी केला आहे.

असीम सरोदे म्हणाले, सुरेश धस यांच्या मदतीने व पुढाकाराने देवस्थानची हजारो एकर जमीन खासगी मालमत्ता असल्यासारखी वळवून घेण्यात आली. त्यानंतर त्याच्यावर प्लॉट पाडण्यात आले. त्यांची विक्री करण्यात आली. असा एक खूप मोठा आर्थिक घोटाळा झाला असल्याचे राम खाडे यांचे म्हणणे होते. त्यांनी माहितीच्या अधिकारात याविषयीची खूप मोठी माहिती काढली होती. हे सर्व बीडमधील प्रकरण आहे. मुख्यत: देवस्थानाच्या जमिनी हडप करणे, ते ही भाजपच्या आमदाराने हे फार गंभीर प्रकरण म्हणून पुढे आले होते.

राम खाडे यांनी याविषयी पोलिसांकडे तक्रार दाखल करण्याची मागणी केली होती. पण पोलिसांनी तक्रार दाखल करून घेतली नव्हती. त्यामुळे आम्ही राम खाडे यांच्यामार्फत मुंबईच्या ईडी कार्यालयात तक्रार केली होती. माझ्या माहितीनुसार, या तक्रारीसोबत जवळपास २००-३०० कागदपत्रे लावण्यात आली होती. सुरेश धस यांनी १००० कोटींचा भूखंड घोटाळा केल्याचे धडधडीत पुरावे दिसत होते. त्यामुळे आता सुरेश धस यांच्याकडून माझ्याही जीवाला धोका आहे, असे असीम सरोदे यांनी म्हटले आहे.

सुरेश धस, भाजपच्या भूमिकेकडे लक्षउल्लेखनीय बाब म्हणजे सुरेश धस हे भाजपचे आष्टी विधानसभा मतदारसंघाचे आमदार आहेत. त्यांनी संतोष देशमुख हत्या प्रकरणात माजी मंत्री धनंजय मुंडे व त्यांचे विश्वासू वाल्मीक कराड यांच्याविरोधात जोरदार टीका केली होती. त्यानंतर मुंडे यांना आपल्या मंत्रिपदाचा राजीनामा द्यावा लागला. तर वाल्मीक कराडलाही अटकेला सामोरे जावे लागले होते. धस यांनी पीक विमा प्रकरणातही स्वत:च्याच महायुती सरकारला धारेवर धरून त्यासंबंधीच्या घोटाळ्याची विस्तृत चौकशी करण्याची मागणी केली होती. पण आता त्यांच्यावरच असीम सरोदे यांनी वरील आरोप केले आहेत. त्यावर सुरेश धस व भाजप कोणती भूमिका घेते? हे पाहणे औत्सुक्याचे ठरणार आहे.