मराठवाडा शिक्षण प्रसारक मंडळाचे माजी सरचिटणीस, मराठवाडा साहित्य परिषदेचे विश्वस्त, छत्रपती शाहू महाराज शिक्षण संस्थेचे सदस्य तथा प्रसिद्ध उद्योगपती मधुकरअण्णा मुळे यांचे मंगळवारी प्रदिर्घ आजाराने निधन झाले. ते 87 वर्षांचे होते. गरीब विद्यार्थ्यांच्या मदतीसाठी कायम तत्पर असणारे मुळे हे शैक्षणिक क्षेत्रात अण्णा म्हणून ओळखले जायचे.
मधुकरअण्णा मुळे यांना त्यांच्या सामाजिक उपक्रमांसाठी आणि महाराष्ट्रातील शेतीला चालना देण्यासाठी महाराष्ट्र शासनाकडून अनेक पुरस्कार मिळालेत. ते ग्रीन गोल्ड सीड्सचे संस्थापक अध्यक्ष देखील होते. मराठवाडा साहित्य परिषदेचे मधुकर अण्णा मुळे हे विश्वस्त मंडळाचे चेअरमन होते. त्यांचाच काळात यशवंतराव चव्हाण नाट्यगृह झाले. त्यांनी यासाठी शरद पवारांच्या मदतीने मसापला निधी मिळवून दिला. 1988 ते 2013 पर्यंत मराठवाडा शिक्षण प्रसारक मंडळाचे सरचिटणीस होते.
मधुकरअण्णा मुळेंच्या काळात MSPM ची भरभराट
मधुकरअण्णा मुळे यांच्या काळात मराठवाडा शिक्षण प्रसारक मंडळाची भरभराट झाली. त्यांच्याच कार्यकाळात 77 वे अखिल भारतीय मराठी साहित्य संमेलन देवगिरी महाविद्यालयात पार पडले. यावेळी मुळे हे या संमेलनाचे स्वागताध्यक्ष होते. 2009 साली MSPM चा सुवर्णमहोत्सव तत्कालीन राष्ट्रपती प्रतिभाताई पाटील यांच्या हस्ते देवगिरी महाविद्यालयाच्या प्रांगणात पार पडला. यावेळी देखील अण्णा मुळे स्वागताध्यक्ष होते.
11 वे जागतिक मराठी साहित्य संमेलन 'शोध मराठी मनाचा' 2011 साली पार पडले. त्या कार्यक्रमाचेही स्वागताध्यक्ष म्हणून अण्णा यांनी काम पाहिले. महाराष्ट्राची सिंहावलोकन परिषद पार पडली त्यावेळी तत्कालीन मुख्यमंत्री अशोक चव्हाण यांची उपस्थिती लाभली होती. अण्णा मुळे यांनी मराठवाडा शिक्षण प्रसारक मंडळाचे स्वतंत्र साहित्य संमेलनही सुरू केले होते.
मराठवाडा शिक्षण प्रसारक मंडळातल्या शिक्षक कर्मचाऱ्यांचे जे काही पुस्तक प्रकाशित झाले त्याचा संपूर्ण खर्च हा मंडळाने केला होता. तसेच 'आशय' नामक त्रैमासिकही त्यांनी सुरू केले होते. अण्णा मुळे यांच्या कार्यकाळातत महाराष्ट्र शासनाचा MSPM ला उत्कृष्ट शिक्षण पुरस्कार मिळाला होता.
अभ्यासू व्यक्तिमत्त्व काळाच्या पडद्याआड
राष्ट्रवादी कॉंग्रेसचे नेते आमदार सतीश चव्हाण यांनी मधुकरअण्णा मुळे यांच्या निधनावर शोक व्यक्त केला आहे. सतीश चव्हाण म्हणाले, मधुकरराव (अण्णा) मुळे यांच्या निधनाचे वृत्त मनाला वेदना देणारे आहे. माझे वडील स्व.भानुदासराव चव्हाण व मुळे अण्णा यांचे मैत्रीपूर्ण संबंध होते. त्यामुळे साहजीकच आमच्या कटुंबाचे ऋणानुबंध फार जुने आहेत. मराठवाडा शिक्षण प्रसारक मंडळाला राज्यभरात वेगळी ओळख निर्माण करून देण्यात आदरणीय मुळे अण्णांचे योगदान कदापी विसरता येणार नाही. शैक्षणिक क्षेत्राबरोबरच साहित्य, सामाजिक क्षेत्रात देखील त्यांनी उल्लेखनीय योगदान दिले. त्यांच्या निधनाने शिक्षण क्षेत्राला वाहून घेतलेले एक अभ्यासू व्यक्तिमत्व आज काळाच्या पडद्याआड गेले आहे, अशा भावना व्यक्त करत सतीश चव्हाण यांनी भावपूर्ण श्रध्दांजली अर्पण केली आहे.
Comment List