1500 दिलेत, महायुतीला मत दिले नाही तर 3000 वसुल करणार; ‘या’ भाजप महिला नेत्याचे वादग्रस्त वक्तव्य

कोल्हापूर : सध्या राज्यात विधानसभा निवडणुकीचा रणसंग्राम सुरु आहे. मतदानाला अवघे काही दिवस शिल्लक असल्याने उमेदवार जोरदार प्रचार करताना दिसत आहेत. मात्र या प्रचारादरम्यान अनेक नेते वादग्रस्त वक्तव्य करताना दिसत आहेत. काही दिवसांपूर्वी भाजप खासदार धनंजय महाडिक यांनी वादग्रस्त वक्तव्य केले होते यानंतर आता कोल्हापूर भाजपच्या महिला उपाध्यक्ष मेघारानी जाधव यांनी वादग्रस्त वक्तव्य केले आहे.
काय म्हणाल्या मेघारानी जाधव?1500 दिलेत, महायुतीला मत दिले नाही तर 3000 वसुल करणार अस वक्तव्यं केलं आहे. या वक्तव्याचा व्हिडीओ सोशल मीडियावर चांगलाच व्हायरल होत आहे. यावर मोठ्या प्रमाणात टीका देखील होत आहे.करवीर पन्हाळा गगनबावडा विधानसभा मतदारसंघाचे महायुतीचे उमेदवार चंद्रदीप नरके यांच्या प्रचारार्थ गारीवाडे इथं आयोजीत करण्यात आलेल्या सभेत भाजपच्या महिला पदाधिकारी मेघारानी जाधव यांनी हे वक्तव्य केले आहे.

या मतदारसंघाबाबत बोलायचे झाले तर याठिकाणी स्वर्गीय पी.एन. पाटील यांचे पूत्र राहुल पाटील आणि शिवसेना एकनाथ शिंदे गटाचे नेते चंद्रदीप नरके यांच्यात मुख्य लढत होणार आहे. कोल्हापूरातील सर्वात मोठा मतदार संघ म्हणून हा मतदार संघ ओळखला जातो. लोकसभा निवडणूकीत याच मतदार संघातून शाहू महाराज यांना 70 हजाराचे लीड मिळाले होते. त्यामुळे या विधानसभा निवडणूकीत मतदार कोणाला मत देतात हे पाहणे महत्वाचे असणार आहे.