मंत्री तानाजी सावंतांच्या सुरक्षारक्षकाच्या बंदुकीची गोळी सुटून थेट 13 वर्षीय मुलाच्या पायात घुसली

सार्वजनिक आरोग्य व कुटुंब कल्याण मंत्री तानाजी सावंत यांच्या धनकवडी येथील बंगल्यावर काम करणाऱ्या सुरक्षा रक्षकाच्या घरात धक्कादायक घटना घडली आहे. सुरक्षारक्षक नितीन शिर्के यांनी बंदुकीत राऊंड भरुन ती बॅग कपाटात ठेवली होती. मात्र त्यांच्या 13 वर्षीय मुलाच्या धक्क्याने ती बॅग खाली पडली आणि बंदुकीतून गोळी सुटून मुलाच्या पायाला लागली असल्याची घटना घडली आहे. अभय शिर्के (13) असे मुलाचे नाव आहे. या घटनेनंतर सुरक्षारक्षक नितीन शिर्के यांच्यावर गुन्हा दाखल करण्यात आला आहे.

नितीन शिर्के हे तानाजी सावंत यांच्या धनकवडीतील बंगल्यावर सुरक्षा रक्षक म्हणून काम करतात. त्यांच्याकडील परवाना असलेली बंदूक त्यांनी लोड करून कसलीही काळजी न घेता बंदुकीची बॅग कपाटात ठेवली. नंतर त्यांच्या मुलाने ते कपात उघडले, कपाटातून त्याने शर्ट काढून घातला, त्यानंतर पॅन्ट घालत असताना कपाटाला धक्का लागला आणि बंदुकीची बॅग खाली पडून त्यातून गोळी सुटली. बंदुकीतून गोळी सुटताच ती अभय शिर्केच्या पायाच्या पोटरीला लागली. यात अभय जखमी झाला. घटना घडताच अभयला तातडीने रुग्णालयात दाखल करण्यात आले.

दरम्यान, या घटनेबाबत पोलिस हवालदार हेमंत राऊत यांनी सहकारनगर पोलिस ठाण्यात फिर्याद दिली आहे. त्यानुसार पोलिसांनी सुरक्षारक्षक नितीन हनुमंत शिर्के यांच्यावर गुन्हा दाखल केला आहे. बंदुकीत राऊंड भरून ठेवल्यावर नितीन शिर्के यांनी कुठलीही खबरदारी घेतली नाही, तसेच याबाबत घरी माहिती देखील दिली नसल्याने हा अनर्थ घडला असल्याचे बोलले जात आहे.