मी आजारी असताना देवेंद्र फडणवीसांनी दबाव टाकून आमचे घर फोडले, पहिले ही हेवेदावे होते, गटबाजी होती परंतु आता घरात घुसून मारायची ही कोणती राजकीय संस्कृती काँग्रेस नेत्याचा खळबळ जनक आरोप

मी आजारी असताना उपमुख्यमंत्री देवेंद्र फडणवीसांनी दबाव टाकून आमचे घर फोडले, असा आरोप काँग्रेसचे ज्येष्ठ नेते मधुकराव चव्हाण यांनी केले आहे. लोकसभा निवडणुकीपुर्वी माजी मंत्री मधुकर चव्हाण यांचे पुत्र सुनील चव्हाण यांनी महाराष्ट्र काँग्रेस कमिटी सचिव पदाचा राजीनामा देत भाजपमध्ये प्रवेश केला होता. त्या पार्श्वभूमीवर काँग्रेसचे नेते तथा माजी मंत्री मधुकरराव चव्हाण बोलत होते. त्यांच्या वक्तव्याने तुळजापुरात चर्चांना उधाण आले आहे.

माजी मंत्री मधुकरराव चव्हाण म्हणाले की, आम्हाला अस्वस्थ करून आमची बदनामी केली. याचे दुःख आम्हाला आहे. त्यामुळे त्यांनी केलेले हे पाप कधी ना कधी त्यांना फेडावे लागेल. भाजप काँग्रेसने लावलेले ग्रामीण भागाच्या विकासाचे रोपटे तोडण्याचे काम करत आहे. मी आजारी असताना फडणवीसांनी दबाव टाकून आमचे घर फोडले, असे म्हणत फडणवीसांवर आरोप केले आहे.

आमदार राणांवर टीकास्त्र

मधुकरराव चव्हाण म्हणाले की, मी 90 वर्षाचा तरुण पुन्हा विधानसभेची निवडणूक लढविण्यासाठी तयार आहे. म्हातारा बैल चांगली पेरणी करू शकतो. खोंडावर पेरणी व्यवस्थित होत नाही,असे म्हणत आमदार राणा जगजीत सिंह यांच्यावरही त्यांनी टीका केली आहे. 2019 च्या विधानसभा निवडणुकीत मधुकर चव्हाण यांचा पराभव झाला होता. काँग्रेसचे सर्वात जेष्ठ आमदार म्हणून त्यांच्याकडे पाहीले जात होते.

ही कोणती संस्कृती

मधुकरराव चव्हाण म्हणाले की, मी 1985 साली उस्मानाबाद विधानसभेची निवडणूक लढण्यासाठी काँग्रेसच्या तिकिटावर डॉक्टर पद्मसिंह पाटील यांच्या विरोधात उभा राहिलो.आम्ही कधी गुंडगिरी केली नाही. मात्र गुंडगिरीच्या विरोधात आम्ही ताकद वापरली. मात्र त्यावेळी माझा अवघ्या 4000 मतांनी पराभव झाला. मी 22 व्या वर्षी राजकारणात आलो. पूर्वी देखील हेवेदावे आणि गटबाजी होती. त्यावेळी विचारांची लढाई होती. मात्र आज घरात घुसून मारायचे प्रकार वाढले आहेत. ही कोणती संस्कृती आहे, असा सवाल त्यांनी केला आहे.