दिल्लीतील दोघे मुंबई ओरबडायला निघालेत:नाव न घेता उद्धव ठाकरेंचा मोदी-शहांवर आरोप; म्हणाले- आमची लढाई हुकूमशाहीविरोधात

2014 मध्येच भाजप शिवसेनेला संपवायला निघाले होते. काही गद्दार जात आहेत ते पैशाच्या हव्यासापोटी जात आहेत. पण त्यांना समजत नाही की, मुंबई संपविण्यासाठी त्यांचा वापर केला जात आहे. मुंबईला लाचार केले जात आहेत. आपण मोदींविरुद्ध लढत नसून हुकुमशाहीविरोधात लढा देत आहोत, दिल्लीत बसलेले दोघे मुंबईला ओरबडायला निघाले आहेत, असा आरोप करत उद्धव ठाकरेंनी यांनी मोदी-शहांवर निशाणा साधला. ज्येष्ठ शिवसैनिकांच्या मेळाव्यात ते बोलत होते.

आता खोट्याचा कारभार सुरू झाला

2012 पर्यंत मुंबई महापालिका नुकसानीत होती. बिहार ते अहमदाबाद बुलेट ट्रेन का करण्यात येत आहे. मुंबई ओरबडण्याचे काम सुरू आहे. त्यामुळे मुंबई अहमदाबाद बुलेट ट्रेन सुरू करण्याचा डाव सुरू झाला. आता खोट्याचा कारभार सुरू झाला आहे, असा टोला उद्धव ठाकरे यांनी शिंदे-फडणवीस सरकारवर केला.

तू किती लायक, हे सांगणे गरजेचे

तू नालायक आहे असे म्हणणे जितके सोपे असते, तेव्हा तू किती लायक आहे, हे देखील दाखवणे देखील महत्त्वाचे आहे. शरद पवारांवर मोदी यांनी ज्या पद्धतीने टीका केली. तेव्हा आम्ही देखील त्यांना तुम्ही नऊ वर्षांच्या काळात काय केले, असा प्रश्न उपस्थित केला? असा प्रश्न उपस्थित करत उद्धव ठाकरे यांनी अप्रत्यक्षपणे मोदींवर निशाणा साधला.

जीव वाचवणे ही प्राथमिकता

कोविड काळात जीव वाचवणे ही प्राथमिकता असते. तेव्हा काय केले हे महत्त्वाचे नाही. परंतू कोविड घोटाळा नावाचे षडयंत्र रचून बदनामी करण्याचे काम सुरू आहे. मुंबईत भ्रष्ट्राचार कसा झाला असा खोटा प्रचार करून मुंबई संपविण्याचा कट रचला जात आहे. व आपल्यातील लोकांचा वापर करून घेतला जात आहे, असा घणाघात उद्धव ठाकरे यांनी केला.

शिवसेना आणि संघर्ष हे नाते कायम

उद्धव ठाकरे म्हणाले की, शिवसेना आणि संघर्ष हे नाते कायम आहे. संघर्षातूनच शिवसेना जन्माला आली आहे. त्यामुळे शिवसेना आणि संघर्ष या एकाच बाजूच्या दोन बाजू आहेत. ज्येष्ठ शिवसैनिकांनी शिवसेना उभी करण्यासाठी कशा पद्धतीने खस्ता खाल्ला, अन काही लोक थेट त्यावर घाला घालू पाहत आहेत.