जे करणे शक्य नाही त्याचा शब्द कधीच देऊ नये:मराठा आरक्षणावर शरद पवार यांचे स्पष्ट मत; मनोज जरांगेच्या उपोषणाचे केले समर्थन

मराठा आरक्षणाच्या मुद्यावरून अवघ्या राज्याचे राजकारण तापले आहे. राष्ट्रवादी काँग्रेसचे अध्यक्ष शरद पवार यांनी शुक्रवारी या प्रकरणी आपली भूमिका स्पष्ट केली. तसेच सरकारच्या भूमिकेमुळेच मराठा आंदोलनाचा प्रश्न चिघळल्याचा आरोपही केला. जे करणे शक्य नाही त्याचा शब्द केव्हाच देऊ नये. मनोज जरांगे यांनी सरकारला वेळ दिला. पण त्यांच्या मागण्या पूर्ण झाल्या नाही. आता सरकारने त्यांच्याशी संवाद साधला पाहिजे, असे शरद पवार म्हणाले.

शरद पवार यांनी शुक्रवारी पत्रकारांशी संवाद साधला. त्यात त्यांनी मनोज जरांगे यांच्या उपोषणाचे समर्थन करत राज्य सरकारला चांगलेच धारेवर धरले. शरद पवार म्हणाले की, मनोज जरांगे पाटलांनी काही मागण्या केल्या आहेत. त्या मागण्यांवर मुख्यमंत्री एकनाथ शिंदे व त्यांच्या सहकाऱ्यांनी त्यांच्याशी सुसंवाद केला. त्यांच्यात प्रत्यक्ष काय बोलणे झाले हे मला माहिती नाही. पण जरांगेंनी सरकारला 30 दिवसांचा वेळ दिल्याचे समजले.

जे करणे शक्य नाही त्याचा शब्द कधी देऊ नये

सरकारने मनोज जरांगे यांना या मुदतीत मराठा समाजाला आरक्षण देण्याचा शब्द दिला होता. पण आता ते आश्वासन पूर्ण झालेले दिसत नाही. जे करणे शक्य नाही त्याचा शब्द कधीच देऊ नये. त्यामुळे आता उपोषण करणाऱ्यांना दोष देता येणार नाही, असे शरद पवार यांनी या प्रकरणी सरकारला धारेवर धरताना स्पष्ट केले.

मराठा आंदोलक मनोज जरांगे यांनी राज्य सरकारला वेळ दिला. पण त्यांच्या मागण्या मान्य झाल्या नाहीत. आता सरकारने त्यांच्याशी संवाद साधला पाहिजे, असेही शरद पवार यावेळी पत्रकार परिषदेत बोलताना म्हणाले.

आता आम्ही थांबणार नाही

दुसरीकडे, मराठा आरक्षणासाठी राज्य सरकारला दिलेली 40 दिवसांची मुदत संपल्यामुळे मनोज जरंगे यांनी जालन्याच्या आंतरवाली सराटीत बुधवारपासून आमरण उपोषण सुरू केले आहे. सरकारने आम्हाला 30 दिवसांची मुदत मागितली. पण आम्ही 40 दिवस दिले. आता आम्ही थांबणार नाही, असे जरांगे यांनी या प्रकरणी स्पष्ट केले.

मुख्यमंत्री शिंदेंवर कुणाचातरी दबाव

यावेळी त्यांनी सरकारवर आपल्याविरोधात काही जणांची माथी भडकवण्याचा आरोपही केला. मराठा समाजाच्या न्याय्य मागण्यांवरून सरकार काही व्यक्तींना माझ्याविरोधात भडकवत आहे. मराठा समाजाला आरक्षण देण्यात येऊ नये यासाठी कुणीतरी मुख्यमंत्री एकनाथ शिंदे यांच्यावर दबाव आणत आहे, असेही ते यावेळी बोलताना म्हणाले.