नार्वेकरांना रस्त्यावर फिरणे अवघड होईल:त्या 40 जणांना फासावर लटकावण्याचे आदेश दिल्लीतून आलेत, संजय राऊत यांचा हल्लाबोल

शिवसेनेचे 40 व राष्ट्रवादी काँग्रेसचे तेवढेच आमदार आपापल्या मूळ घरांत चोरी करून पळून गेलेत. त्या चोरांना, दरोडेखोरांना विधानसभा अध्यक्ष सार्वभौमत्वाच्या नावावर संरक्षण देत असतील, तर खुर्ची गेल्यानंतर त्यांना महाराष्ट्राच्या रस्त्यांवर पायी फिरणे अवघड होईल, असा निर्वाणीचा इशारा शिवसेनेच्या ठाकरे गटाचे खासदार संजय राऊत यांनी दिला आहे.

संजय राऊत यांनी मंगळवारी पत्रकारांशी संवाद साधला. त्यात त्यांनी विधानसभा अध्यक्ष राहुल नार्वेकर यांच्यावर अपात्रतेची सुनावणी करण्यात जाणिवपूर्वक दिरंगाई करत असल्याचा आरोप केला. ते म्हणाले की, हे सरकार संविधानविरोधी व बेकायदा आहे. सरकार चोर व लफंगे चालवत आहेत. त्यांना घटनात्मक पदावर बसलेली व्यक्ती संरक्षण देत असेल तर या देशात व राज्यात काय सुरू आहे याची कल्पना न केलेली बरी.

सार्वभौमत्वाचा अर्थ...

राहुल नार्वेकर वारंवार विधीमंडळाच्या सार्वभौमत्वाचा दाखला देत आहेत. पण सार्वभौमत्वाचा अर्थ चोरी करून एखाद्याने दुसऱ्याच्या घरात शिरावे आणि त्या घरातील मालकाने त्या चोराला, खून्याला संरक्षण द्यावे असा होत नाही, असे संजय राऊत म्हणाले.

शिवसेनेचे 40 व राष्ट्रवादीचेही तेवढेच आमदार आपल्या मूळ घरात चोरी व लूट करून गेलेत. त्या चोरांना, दरोडेखोरांना विधानसभेचे अध्यक्ष सार्वभौमत्वाच्या नावाने संरक्षण देत असतील तर राहुल नार्वेकरांचे नाव विधानसभा अध्यक्ष म्हणून या देशाच्या व राज्याच्या काळ्याकुट्ट इतिहासात नोंदले जाईल, असेही संजय राऊत यावेळी म्हणाले.

रस्त्यावर फिरणेही अवघड होईल

माजी राज्यपाल भगतसिंग कोश्यारी यांच्यानंतर राहुल नार्वेकर उद्या जेव्हा ते खुर्चीवर नसतील तेव्हा त्यांना महाराष्ट्राच्या रस्त्यावर फिरणेही मुश्किल होईल. या राज्यातील जनता त्यांना माफ करणार नाही. तुम्हाला निर्णय घ्यायचा आहे. 'त्यांना' (शिंदे गटाचे आमदार) फासावर लटकवण्याचे आदेश दिल्लीतून आलेत. सर्वोच्च न्यायालयाने त्यांना लोकशाहीच्या मारेकऱ्यांची उपमा दिली आहे. पण कोर्टाने त्यांच्या अपात्रतेचे काम विधिमंडळाच्या अध्यक्षांवर सोपवले आहेत.

80 आमदारांना फासावर लटकवावे लागेल

सुप्रीम कोर्ट एखाद्या गुन्हेगाराला फाशीची शिक्षा सुनावते. पण फासावर लटकवण्यासाठी एका जल्लादाची गरज असते. न्यायमूर्ती त्यांना फासावर लटकवत नाहीत. हे जल्लादाचे काम करण्याची जबाबदारी विधिमंडळ अध्यक्षांवर आहे. त्यामुळे अध्यक्षांना शिवसेनेचे 40 व राष्ट्रवादीचे 40 अशा एकूण 80 आमदारांना घटनात्मकदृष्ट्या फासावर लटकावावेच लागेल. तुम्ही कितीही पळ काढण्याचा प्रयत्न केला तरी आता या आमदारांची सुटका नाही हे नार्वेकरांनी लक्षात घ्यावे, असे संजय राऊत म्हणाले.

महाराष्ट्राला चोरांच्या सरदाराची गरज नाही

नार्वेकरांचे वेळापत्रक लफंगेगिरी आहे. राहुल नार्वेकर चोरांचे सरदार म्हणून की संविधानाचे रखवालदार म्हणून काम करू इच्छितात हे त्यांनी ठरवावे. या महाराष्ट्राला चोरांच्या सरदाराची गरज नाही. महाराष्ट्राला संविधानाच्या रखवालदारांची गरज आहे. चौकीदार चोर आहे असे म्हटलं जाते. आता संविधानपीठावर बसणारे चोर आहेत असे म्हणण्याची वेळ महाराष्ट्रावर येऊ नये, असेही संजय राऊत यावेळी राहुल नार्वेकरांवर आगपाखड करताना म्हणाले