कल्याण मध्ये शेवटच्या दिवशी भाजपच्या रॅलीत स्फोट तर लातूर जिल्ह्यात निवडणूक जिंकलेल्या नगरसेविकेची जीवनाच्या लढाईत हार ; अचानक झालेल्या निधनामुळे नागरिकांमध्ये हळहळ......

राज्यातील २९ महानगरपालिका आणि नगरपालिका निवडणुकीच्या (KDMC Election) प्रचाराची आज सांगता झाली. गेल्या अनेक दिवसांपासून सर्वच राजकीय पक्षांचे नेते आणि कार्यकर्ते प्रचारात पूर्ण ताकदीने उतरले होते. मात्र प्रचाराच्या शेवटच्या दिवशी कल्याण आणि अहमदपूर येथे दोन वेगळ्या, परंतु अत्यंत दुर्दैवी आणि धक्कादायक घटना घडल्या, ज्यामुळे संपूर्ण राज्यात खळबळ उडाली आहे.
कल्याणमध्ये प्रचार रॅलीदरम्यान भीषण दुर्घटनाकल्याण शहरातील योगिधाम परिसरात महायुतीच्या पॅनल क्रमांक २ च्या उमेदवारांच्या प्रचार रॅलीत मोठी दुर्घटना घडली. रॅलीत कार्यकर्ते आणि समर्थक जोशात निघाले असताना, एका कार्यकर्त्याने हातात धरलेला झेंडा वरच्या बाजूला लोंबकळणाऱ्या टाटा कंपनीच्या उच्च-दाबाच्या विद्युत वायरला लागला.यामुळे जोरदार स्फोट झाला आणि विजेचा धक्का बसल्याने क्षितिज पाटील या महायुतीच्या कार्यकर्त्याला गंभीर जखमा झाल्या. त्यांना तात्काळ जवळच्या रुग्णालयात दाखल करण्यात आले असून, त्यांच्यावर सध्या उपचार सुरू आहेत. डॉक्टरांच्या माहितीनुसार, त्यांची प्रकृती स्थिर असली तरी गंभीर आहे.

या दुर्घटनेत महायुतीचे उमेदवार दया गायकवाड, वनिता पाटील, गणेश कोट आणि अनघा देवळेकर यांच्या प्रचार रॅलीवर थेट परिणाम झाला. रॅली तात्पुरती थांबवावी लागली. या घटनेनंतर स्थानिक नागरिक आणि कार्यकर्त्यांनी योगिधाम परिसरातील लोंबकळणाऱ्या, जुनी आणि धोकादायक विद्युत वाहिन्यांचा मुद्दा ऐरणीवर आणला आहे. अनेक ठिकाणी वीजवाहिन्या अत्यंत कमी उंचीवर लटकलेल्या असल्याने अशा दुर्घटना पुन्हा घडू नयेत, यासाठी तातडीने कारवाई करण्याची मागणी जोर धरू लागली आहे.
नवनिर्वाचित नगरसेविकेचे निधनदुसरीकडे, लातूर जिल्ह्यातील अहमदपूर येथे आणखी एक हृदयद्रावक घटना घडली. नुकत्याच पार पडलेल्या नगरपालिका निवडणुकीत राष्ट्रवादी काँग्रेस (अजित पवार गट) कडून नवनिर्वाचित नगरसेविका म्हणून निवडून आलेल्या शाहूताई कांबळे यांचा आज पहाटे हृदयविकाराच्या झटक्याने मृत्यू झाला.पहाटेच्या सुमारास त्यांना अचानक छातीत तीव्र वेदना सुरू झाल्या. नातेवाइकांनी तातडीने त्यांना अहमदपूरमधील रुग्णालयात नेले, मात्र रुग्णालयात पोहोचताच डॉक्टरांनी त्यांना मृत घोषित केले.
या घटनेमुळे अहमदपूर शहरासह संपूर्ण लातूर जिल्ह्यात शोककळा पसरली आहे. शाहूताई कांबळे या पक्षाच्या निष्ठावान कार्यकर्त्या होत्या. त्यांनी मेहनत आणि जिद्दीने निवडणूक जिंकली होती आणि नगरसेविकेच्या पदाची जबाबदारी स्वीकारण्याची तयारी सुरू केली होती. त्यांच्या अकाली निधनाने पक्षातील कार्यकर्ते आणि मतदारांमध्ये मोठा धक्का बसला आहे.
निवडणूक प्रचाराच्या शेवटच्या दिवशी घडलेल्या या दोन दुर्दैवी घटनांनी राजकीय वातावरणावर गंभीर परिणाम केला आहे. एकीकडे सुरक्षा आणि आरोग्य व्यवस्थेच्या कमतरतेचा प्रश्न ऐरणीवर आला आहे, तर दुसरीकडे स्थानिक पातळीवरील मूलभूत सुविधांच्या कमतरतेचे (विजेच्या वायर, आपत्कालीन वैद्यकीय सुविधा) दर्शन घडले आहे. यामुळे हे दोन्ही प्रश्न पुन्हा एकदा ऐरणीवर आले आहेत.